ެދޮރުވެރިޔާ ސްކީމް ފުލެޓް ލިބޭ ފަރާތްތައް ކަނޑައެޅުމުގެ އުސޫލު ހާމަކޮށްފި

މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން ގެދޮރުވެރިޔާ ސްކީމުގެ ދަށުން ފުލެޓް ލިބޭ ފަރާތްތައް ކަނޑައެޅުމަށް ގެންގުޅޭނެ އުސޫލު ހާމަކޮށްފިއެވެ. މި އުސޫލު ހާމަކޮށްފައިވަނީ ކުރިން ޝާއިޢުކޮށްފައިވާ ލިސްޓާ ގުޅިގެން ހުށަހެޅިފައިވާ ޝަކުވާތަކަށް ބެލުމަށްފަހުގައެވެ.

މިނިސްޓްރީން ނެރުނު އިޢުލާނުގައި ބަޔާންކޮށްފައިވާ ގޮތުގައި، ފުލެޓް ލިބޭ ފަރާތްތަކުގެ ފައިނަލް ލިސްޓުގެ ގޮތުގައި ބަލާނީ 5 ނޮވެންބަރު 2023 ގައި ޝާއިޢުކުރި ލިސްޓެވެ. ނަމަވެސް، 15 ނޮވެންބަރު 2023 ގައި އިޢުލާންކުރި ލިސްޓަށް ޢަމަލުކުރުމުގައި އިތުރު ކަންތައްތަކެއް ބަލާނެކަމަށް ބުނެފައިވެއެވެ.

މި އުސޫލުގެ ދަށުން، ފުލެޓަށް އެދޭ މީހުންގެ ޝަރުތުތައް ފުރިހަމަނުވާ ފަރާތްތައް ލިސްޓުން އުނިކުރެވޭނެއެވެ. އަދި 26 ޖޫން 2022 އިން ފެށިގެން 15 އަހަރު ކުރިން މާލެއަށް ދިރިއުޅުން ބަދަލުކޮށްފައިވާ ފަރާތްތަކުގެ ތެރެއިން، އެހެން ރަށަކަށް ދިރިއުޅުން ބަދަލުކުރިކަން ސާބިތުނުވާނަމަ، އެ ފަރާތްތައް ބެލެވޭނީ މެދުނުކެނޑި މާލޭގައި ދިރިއުޅެމުންދާ ފަރާތްތަކެއްގެ ގޮތުގައެވެ.

މީގެ އިތުރުން، ބިންވެރިޔާ ސްކީމުން އަނބިމީހާ ނުވަތަ ފިރިމީހާއަށް ގޯތި ލިބިފައިވާ ފަރާތްތަކަށް ފުލެޓް ލިބޭނީ އެ ގޯތި ދޫކޮށްލަން އެއްބަސްވާނަމައެވެ. އަދި ފޯމުގައި ދީފައިވާ މަޢުލޫމާތަކީ ޞައްޙަނޫން މަޢުލޫމާތެއްކަން ސާބިތުވެއްޖެނަމަ، އެ ފަރާތެއްގެ ފޯމު ބާޠިލުކުރެވޭނެއެވެ.

މިނިސްޓްރީން އިތުރަށް ބަޔާންކޮށްފައިވާ ގޮތުގައި، ފުލެޓް ލިބޭ ފަރާތްތަކުގެ ލިސްޓުގައި ދެމަފިރިން ހިމެނިފައިވާނަމަ، ފުލެޓް ލިބޭނީ އެ ދެމަފިރިންގެ ތެރެއިން ކޮންމެވެސް އެއް ފަރާތަކަށެވެ. އަދި ލިސްޓުން އުނިވާ ފަރާތްތަކުގެ ބަދަލުގައި ފުލެޓް ލިބޭނީ ކުރިން އިޢުލާންކޮށްފައިވާ ގުރުއަތު ލިސްޓުގައި ހިމެނޭ ފަރާތްތަކަށެވެ.

މި އުސޫލު ތަންފީޛުކުރުމުގައި، ފުލެޓް ނުލިބޭ ފަރާތްތަކަށް އެކަން ލިޔުމުން އަންގައި، އެޕީލްކުރުމުގެ ފުރުޞަތު ދެވޭނެކަމަށްވެސް މިނިސްޓްރީން ބުނެފައިވެއެވެ